Եգիպտոսի նախագահ Աբդել ֆաթահ Ալ-Սիսին Շարմ էլ-Շելխում հանդիպել է ԱՄԷ-ի թագաժառանգ Մուհամմադ բըն Զայեդ Ալ-Նահյանի հետ:
Եգիպտոսի նախագահի աշխատակազմը տեղեկացրել է, որ քննարկվել են երկկողմ հետաքրքրության մի շարք հարցեր՝ այդ թվում տնտեսական ներդրումներին առնչվող խնդիրները:
Սիսին ընդգծել է, որ Եգիպտոսը հանձնառու է Պարսից ծոցի անվտանգության պահպանմանը և «մերժում է ցանկացած գործողությունը, որն ապակայունացնելու է այն»:
Էմիրաթական «WAM» պաշտոնական լրատվամիջոցն իր հերթին հայտնել է, որ թագաժառանգի այցը նպատակաուղղված է երկկողմ համագործակցության ամրապնդմանը:
Ուշագրավ է, որ պաշտոնական ոչ մի մեկնաբանություն չի արվել, թե արդյոք Իսրայելի վարչապետ Նաֆթալի Բեննեթը ներգրավված է եղել բանակցություններում, թե ոչ: Սակայն իսրայելցի և եգիպտացի պաշտոնյաներ հաստատել են, որ Բեննեթը Եգիպտոս էր ժամանել Սիսիին հանդիպելու համար: Իսրայելական մի շարք լրատվամիջոցներ տեղեկություն են տարածել այն մասին, որ Շարմ Էլ-Շեյխում եռակողմ գագաթաժողով է կայանալու: Մասնավորապես իսրայելական «The Times of Israel» պարբերականը գրել է, որ եգիպտացի մի պաշտոնյան, ով ցանկացել է մնալ անանուն, հայտնել է, որ Բեննեթը Շարմ Էլ-Շեյխում Եգիպտոսի նախագահի և ԱՄԷ-ի թագաժառանգի հետ առաջին անգամ մասնակցելու է եռակողմ գագաթաժողովի: Պաշտոնյան նաև հաստատել է, որ Իսրայելի վարչապետը նախապես չհայտարարված այցով է ժամանել Սինայ:
Հետևեք մեզ տելեգրամում
