Սաուդյան Արաբիան և Քուվեթը ողջունել են Լիբանանի վարչապետ Նաջիբ Միկաթիի հայտարարությունն առ այն, որ Բեյրութը հանձնառու է միջոցներ ձեռնարկել Պարսից ծոցի համագործակցության խորհրդի անդամ պետությունների հետ հարաբերությունների վերականգնման ուղղությամբ:
Սաուդյան Արաբիայի արտաքին քաղաքական գերատեսչությունը հաղորդագրություն է տարածել, համաձայն որի՝ դրական է գնահատել Միկաթիի հայտարարությունը և հույս հայտնել, որ այն խթանելու է Լիբանանի դերի և հեղինակության բարձրացմանը:
Քուվեյթի արտգործնախարարությունը նույնպես ողջունել է Միկաթիի հայտարարությունը՝ հավելելով, որ սպասում է կառուցողական և գործնական միջոցառումների իրականացմանը, որոնք կնպաստեն Լիբանանում անվտանգության և կայունության ամրապնդմանը:
Նշենք, որ օրեր առաջ Լիբանանի վարչապետը հարցազրույց էր տվել սաուդական «aawsat» լրատվամիջոցին՝ հայտարարելով, որ իր կառավարությունը լիովին հանձնառու է պահպանել բարիդրացիական հարաբերությունները Պարսից ծոցի երկրների հետ՝ այդ թվում Սաուդյան Արաբիայի։
Հիշեցնենք, որ Քուվեյթի արտգործնախարար Ալ-Սաբահը հունվարի 23-ին լիբանանցի բարձրաստիճան պաշտոնյաներին էր ներկայացրել Քուվեյթի նախաձեռնությունը, որը նպատակաուղղված է Լիբանանի և Պարսից ծոցի երկրների միջև դիվանագիտական ճգնաժամի հաղթահարմանը: Այն բաղկացած է 12 մասից և նախապայմաններ չի առաջադրում: Իսկ Բեյրութի և Պարսից ծոցի երկրների միջև դիվանագիտական ճգնաժամի առիթ դարձավ Լիբանանի տեղեկատվության նախարար Ժորժ Կորդահիի՝ Aljazeera-ին տված հարցազրույցը, որով նա քննադատել էր Սաուդյան Արաբիայի քաղաքականությունը Եմենի պատերազմում:
Հետևեք մեզ տելեգրամում
