Իսրայելի հետ խաղաղ բանակցությունները թույլատրելի են միայն այն պայմանով, որ ազատագրվեն Լիբանանի և Սիրիայի օկուպացված բոլոր տարածքները: Այս մասին հայտարարել է Լիբանանի նախագահ Միշել Աունն՝ Իտալիա կատարած այցի ժամանակ իտալական «La Repubblica» օրաթերթին տված հարցազրույցում։
«Լիբանանը պատերազմներ սիրող երկիր չէ: Սակայն Լիբանանի և Սիրիայի որոշ տարածքների դեռ օկուպացված են։ Երբ մենք ազատագրենք դրանք, այլևս զինված առճակատման պատճառ չի լինի։ Հենց դա էլ կհանգեցնի Իսրայելի հետ խաղաղ բանակցությունների գործընթացի մեկնարկին»,- հայտարարել է Լիբանանի նախագահը:
Աունն ընդգծել է, որ Բեյրութի և Թել Ավիվի միջև դիվանագիտական հարաբերություններ հաստատված չեն։ Լիբանանը միայն ՄԱԿ-ի միջնորդությամբ է անուղղակի բանակցություններ վարում Իսրայելի հետ՝ ծովային սահմանների դեմարկացիայի շուրջ։
Հետևեք մեզ տելեգրամում
