Երեկ Թուրքիայի արտգործնախարարություն է կանչվել Անկարայում Իրաքի գործերի ժամանակավոր հավատարմատարն՝ ի պատասխան պաշտոնական Բաղդադի հայտարարության կապված Թուրքիայի կողմից Իրաքի հյուսիսում սկսած ռազմական գործողության:
Ավելի վաղ Իրաքի արտաքին գործերի նախարարությունը Բաղդադում Թուրքիայի դեսպանին փոխանցել էր «բողոքի նոտա»՝ վերոնշյալ ռազմական գործողության առնչությամբ:
Թուրքական ԶՈՒ-ն Իրաքի հյուսիսում «Քուրդիստանի բանվորական կուսակցության» (ՔԲԿ-PKK) դեմ մեկնարկել է «Մագիլ-Կողպեք» ռազմական գործողությունը: Ի դեպ PKK-ն Թուրքիայում համարվում է ահաբեկչական կառույց: Պաշտոնական Անկարան հավատարմատարին հայտնել է, որ Բաղդադի հայտարարությունները «անհիմն» են:
Հիշեցնենք, որ Թուրքիայի նախագահ Ռեջեփ Թայիփ Էրդողանը հայտարարել էր, որ Թուրքիան ռազմական գործողություններն իրականացնում է «համագործակցելով Իրաքի կենտրոնական կառավարության և Հյուսիսային Իրաքի տարածաշրջանային կառավարության հետ»։
Սակայն Իրաքի արտաքին գործերի գերատեսչությունն արձագանքել էր այս հայտարարությանը՝ հերքելով որևէ համագործակցություն:
Իրենց հերթին Իրաքյան Քուրդիստանի զինված ուժերը ևս հաստատել են, որ «երբեք չեն մասնակցել այդ գործողություններին և չեն տեղաշարժել իրենց ուժերը»՝ ընդգծելով «Քուրդիստանի շրջանի և Իրաքի ինքնիշխանությունը հարգելու անհրաժեշտությունը»։
Հետևեք մեզ տելեգրամում
