Այսօր Սիրիայում Հայոց ցեղասպանության 107-րդ տարելիցին նվիրված ջահերով երթ է կազմակերպվելու: Այս մասին տեղեկանում ենք Սիրիայում գործող Հայ հեղափոխական դաշնակցության կուսակցության «Սուրիոյ երիտասարդական միության» Facebook-ի էջից:
«Սուրիոյ երիտասարդական միության» տեղեկացմամբ՝ ապրիլի 22-ին Սիրիայի ժամանակով ժամը 18:30 իրականցվելու է ջահերով երթ Հալեպ քաղաքում: Ջահակիրները քայլերթով շարժվելու են դեպի քաղաքի ազգային գերեզմանատուն:
Հատկանշական է, որ «Սուրիոյ Երիտասարդական միության» կազմակերպմամբ Սիրիայի այլ հայաբնակ քաղաքներում ևս Հայոց ցեղասպանության հիշատակի արարողություններ են անցկացվելու:
Ապրիլի 23-ին Լաթաքիայի Սուրբ Աստվածածին եկեղեցում մոմավառություն է իրականացվելու: Նույն օրը Քեսաբ քաղաքի Սուրբ Աստվածածին եկեղեցում կայանալու է բանախոսություն Հայոց ցեղասպանության շուրջ:
Նշենք, որ այս տարի լրանում է հայոց ցեղասպանության 107-րդ տարելիցը: 1915 թվականին Օսմանյան կայսրության որդեգրած ցեղասպան քաղաքականությանը զոհ գնացին շուրջ 2 միլիոն անմեղ հայեր, հայրենազրկվեցին հարյուր հազարավոր հայեր: Թուրքիան մինչ օրս չի ճանաչել հայոց ցեղասպանությունը՝ շարունակելով ժխտման քաղաքականությունը:
Հետևեք մեզ տելեգրամում
