Իրանի նախագահ Էբրահիմ Ռայիսին անդրադարձել է ՄԱԳԱՏԷ-ի կողմից վերջերս ընդունված բանաձևին՝ հայտարարելով, որ Իրանն իր դիրքերից մեկ քայլ անգամ հետ չի գնա:
«Թշնամին չի ցանկանում, որ այս երկիրը միջուկային արդյունաբերություն, առաջադեմ ռազմական արդյունաբերություն և առաջադեմ ավտոմոբիլային արդյունաբերություն ունենա: Բայց մեր երիտասարդները կամքերի պատերազմում թիրախավորել են թշնամու հուսահատությունը»,- հայտարարել է Էբրահիմ Ռայիսին՝ Չահարմահալ և Բախթիարի նահանգում ունեցած ելույթի ժամանակ:
Իրանի նախագահը շարունակել է խոսքը՝ ավելացնելով.
«Քանի՞ անգամ է ցանկանում եք Իրանի ժողովրդին փորձության ենթարկել: Կարծու՞մ եք՝ բանաձևեր ընդունելով մենք հետքայլ կանենք: Հանուն Աստծո և հանուն ժողովրդի Իրանն իր դիրքերից մեկ հետքայլ անգամ չի անի»:
Նշենք, որ ՄԱԳԱՏԷ-ի կառավարիչների խորհրդում ընդունվել է ԱՄՆ-ի, Ֆրանսիայի, Մեծ Բրիտանիայի և Գերմանիայի ներկայացրած բանաձևը, որով Իրանին կոչ է արվում բացատրություն տալ միջուկային երեք վայրերում հայտնաբերված ուրանի մասնիկների վերաբերյալ։
Իրանի ԱԳՆ խոսնակ Սաիդ Խաթիբզադեն, արձագանքելով բանաձևի ընդունմանը, հայտարարել է, որ Իրանը վճռական պատասխան է տալու: Իրանի ԱԳՆ-ն էլ հաղորդագրություն է տարածել՝ նշելով որ Իրանի պատասխան քայլեր է ձեռնարկելու, որոնց թվում են զարգացած ցենտրիֆուգների տեղակայումն ու Լրացուցիչ արձանագրության շրջանակներում տեղադրված տեսախցիկներն անջատելը:
Հետևեք մեզ տելեգրամում
