Իրաքյան շիական «Ալ-Սադր» շարժման կողմնակիցները հեռանում են Բաղդադում գտնվող «Կանաչ գոտուց» այն բանից հետո, երբ Մուկթադա Ալ-Սադրը կոչ է արել իր աջակիցներին դադարեցնել բախումները:
Իրաքյան SHAFAQ լրատվամիջոցը տեղեկացնում է, որ շարժման առաջնորդ Մուկթադա Ալ-Սադրը կարգադրել է իր աջակիցներին հեռանալ «Կանաչ գոտուց» 1 ժամվա ընթացքում՝ ավելացնելով, որ չի թույլատրում կազմակերպել ո՛չ խաղաղ ցույցեր, ո՛չ էլ նստացույց:
«Քաղաքականությունից իմ հեռանալը լեգիտիմ է և վերջնական, քաղաքական պատճառներ չունի»,- ասել է Ալ-Սադրը՝ ավելացնելով, որ այն, ինչ տեղի է ունենում, հեղափոխություն չէ, քանի որ խաղաղ բնույթ չի կրում:
Այս հայտարարությունից մի քանի րոպե անց մարդիկ սկսել են լքել «կանաչ գոտու» տարածքն։ Արդյունքում Իրաքի բանակը չեղարկել է սահմանված պարետային ժամը։
Նա ներողություն է խնդրել Իրաքի ժողովրդից երկօրյա արյունալի բախումների համար:
Նշենք, որ երեկվանից Բաղդադում՝ «Կանաչ գոտում», որտեղ տեղակայված են կառավարական շենքեր և օտարերկրյա դիվանագիտական ներկայացուցչություններ, «Ալ-Սադր» շարժման և «Կոորդինացիոն շրջանակի» կողմնակիցների միջև բախումներ են տեղի ունենում: Այսօր հաղորդվել է, որ զոհերի թիվը հասել է 30-ի: Կան հարյուրավոր վիրավորներ:
Հետևեք մեզ տելեգրամում
