Լիբանանյան «Kataeb» լրատվամիջոցում հոդված է հրապարկվել, որտեղ ուշագրավ մանրամասներ են ներկայացվել Իրանի և Ադրբեջանի նախագահների վերջին հանդիպման վերաբերյալ:
Ստորև Region Monitor-ը ներկայացնում հոդվածի ուշագրավ հատվածները:
Նախ նշվել է, որ Իրանը ԻՀՊԿ ցամաքային ուժերի զորավարժությունները մեկնարկել է Ֆրանսիայի նախագահ Էմանուել Մակրոնի հայտարարությունից օրեր անց, երբ նա մեղադրել էր Ռուսաստանին Հարավային Կովկասը ապակայունացնելու մեջ՝ նպատակ հետապնդելով մասնատել Արևմուտքն ու միջամտել Լեռնային Ղարաբաղի հակամարտությանը՝ ի շահ Ադրբեջանի:
Այս համատեքստում աղբյուրը, որն ուղեկցում էր Իրանի նախագահ Էբրահիմ Ռայիսիին Ղազախստան կատարած այցի ժամանակ, բացահայտել է, որ Աստանայում կայացած Փոխգործակցության և վստահության միջոցների ամրապնդմանն ուղղված խորհրդակցության շրջանակներում Էբրահիմ Ռայիսիի և Իլհամ Ալիևի հանդիպումը չի եղել բարեկամական, անգամ ականատես են եղել երկու երկրների ղեկավարների վիճաբանությանը:
Աղբյուրը տեղեկացրել է, որ վիճաբանությունը սկսվել է այն բանից հետո, երբ Ալիևը քննադատել է իրանական զինուժի կուտակումն Ադրբեջանի սահմանին` այդ քայլը սպառնալիք դիտարկելով Բաքվի անվտանգությանը:
Ալիևը կտրուկ է արձագանքել, երբ Ռայիսին պատասխանել է, թե ռազմական մոբիլիզացիան ուղարկվել է սահմանային գոտի ոչ թե խնջույքի կամ վարժանքներ անցկացնելու, այլև անվտանգություն և կայունություն հաստատելու համար, պայքարելու ցանկացած ծրագրի դեմ, որը փոփոխություններ է առաջացնելու՝ ազդելով կամ կտրելով Իրանի և Հայաստանի միջև ցամաքային ճանապարհը:
Ալիևը Ռայիսիին մեղադրել է Հայաստանին ռազմական աջակցություն տրամադրելու և զինելու մեջ՝ Ադրբեջանին դիմակայելու համար: Ռայիսին հերքել է այս մեղադրանքները՝ իր հերթին մեղադրելով ադրբեջանցի գործընկերոջը «սիոնիստներին» լսելու մեջ: Իրանի նախագահը քննադատել է նաև վերջին օրերին Իսրայելի պաշտպանության նախարարի գլխավորած պատվիրակության ացը Բաքու:
Նշվել է նաև, որ Ռայիսին Ալիևին մեղադրել է Իրանում տեղի ունեցող բողոքի ակցիաների ֆոնին «անջատողական իրանական ադրբեջանցիներին» աջակցելու և նրանց սեփական լրատվամիջոցներ ստեղծելու թույլտվություն տալու մեջ: Սրան ի պատասխան՝ Ալիևը նշել է, թե Թեհրանը չի հրաժարվել հեղափոխությունը արտահանելու գաղափարից:
Հետևեք մեզ տելեգրամում
