Իսրայելական «The Jerusalem Post» (JPost) պարբերականն անդրադարձել է եռօրյա զորավարժություններին, որոնք անցկացվել էին Իրանի կողմից երկրի Արդաբիլ և Արևելյան Ատրպատական նահանգներում՝ սահմանակից Ադրբեջանին և Հայաստանին։
Ըստ JPost-ի՝ Իրանը մտահոգված է, որ Ադրբեջանը ցանկանում է նոր հարձակում սկսել Հայաստանի դեմ և կտրել Հայաստանի ու Իրանի միջև սահմանը, ինչը կխաթարի հյուսիս-հարավ առևտրային ուղին և ենթադրաբար կմեկուսացնի Իրանին:
Պարբերականը հիշեցրել է, որ Իրանը մեղադրել է Ադրբեջանին Իսրայելի հետ սերտ համագործակցության մեջ՝ հավելելով, որ Իրանն իրեն համարում է և՛ Բաքվի, և՛ Երևանի բարեկամը, սակայն մի փոքր նախապատվություն ունի Հայաստանի նկատմամբ։
«Ի՞նչու է այս հատվածը կարևոր Իրանի համար։ Իրանի համար այս տարածքի կարևորությունն այն է, որ Հայաստանն է դարպաս հանդիսանում Իրանից Եվրոպա ապրանքների արտահանման և տարանցման համատեքստում։ Այս պարզ պատճառով Իրանի և Հայաստանի միջև ընդհանուր սահմանային անցումները շատ կարևոր են Իրանի համար»,- գրել է JPost-ը։
Հետևեք մեզ տելեգրամում
