Թուրքիայի հարավարևելքում՝ Դիարբեքիրի շրջանում պայթել է ճանապարհին կայանված մեքենայում տեղադրված ական:
Թիրախը եղել է այդ պահին ճանապարհով անցնող ոստիկանների փոքր ավտոբուսը: Պայթյունի հետևանքով մի քանի ոստիկաններ թեթև վնասվածքներ են ստացել:
«Առավոտյան 5:10-ին ահաբեկիչները պայթեցրել են ականը: Փառք Աստծո, մեր գործընկերներին ընդամենը ստուգման համար ուղարկել ենք հիվանդանոց: Նրանցից 7-ն արդեն դուրս են գրվել, 2-ը դեռ ստուգվում են, նրանց կյանքին վտանգ չի սպառնում»,- ասել է Դիարբեքիրի նահանգապետ Ալի Իհսան Սուն:
Պայթեցված մեքենան կայանված է եղել շրջանի ամենախոշոր քաղաքի՝ Դիարբեքիրի կենտրոնից մոտ 10-ը կիլոմետր հեռավորության վրա, մսամթերքի շուկայի մոտակայքում:
Թուրքիայի ներքին գործերի նախարար Իսմայիլ Սոյլուն ասել է, որ ահաբեկչական պայթյունի գործով արդեն կա երկու ձերբակալված:
Դիարբեքիրի բնակչության մեծ մասը քրդեր են: Այդ շրջանում հաճախ են տեղի ունենում զինված միջադեպեր:
Հետևեք մեզ տելեգրամում
