Խաղաղությունը Սաուդյան Արաբիայի և Իսրայելի միջև հանգեցնելու է պաղեստինա-իսրայելական հակամարտության կարգավորման: Այս մասին հայտարարել է Իսրայելի վարչապետի թեկնածու Բենյամին Նեթանյահուն՝ Al Arabiya-ին տված հարցազրույցում:
«Կարծում եմ, որ Սաուդյան Արաբիայի հետ խաղաղությունը երկու նպատակի կծառայի. դա աննախադեպ թռիչք կլինի Իսրայելի և արաբական աշխարհի միջև ընդհանուր խաղաղության համար, այն կփոխի մեր տարածաշրջանն աներևակայելի ձևերով», – նշել է Նեթանյահուն:
Նեթանյահուի խոսքով՝ այն վերջիվերջո կնպաստի պաղեստինա-իսրայելական խաղաղությանը:
«Ես հավատում եմ դրան և մտադիր եմ հետամուտ լինել»,- հավելել է նա:
Հատկանշական է, որ Սաուդյան Արաբիայի և Իսրայելի միջև դիվանագիտական հարաբերություններ գոյություն չունեն: 2020 թվականին Իսրայելն «Աբրահամյան համաձայնագրերի» շրջանակում արաբական մի շարք երկրների հետ կարգավորել էր դիվանագիտական հարաբերությունները: Սակայն սաուդական կողմը պարբերաբար հայտարարել է, որ Իսրայելի հետ դիվանագիտական հարաբերությունների հաստատում հնարավոր է միայն պաղեստինյան խնդրի՝ «երկու պետություն սկզբունքով» լուծելու պարագայում:
Այս համատեքստում Al Arabiya-ին տված հարցազրույցում Նեթանյահուն կոչ է արել «ստեղծագործ» գտնվել՝ խուսափելով «երկու պետություն սկզբունքի» կիրառումից:
Հետևեք մեզ տելեգրամում
