Թուրքիայի նախագահ Ռեջեփ Թայիփ Էրդողանը շահել է ընդդիմադիր «Ժողովրդահանրապետական» կուսակցության (ԺՀԿ-CHP) նախագահ Քեմալ Քըլըչդարօղլուի դեմ հարուցված հերթական դատական գործը։ Անկարայի առաջին ատյանի դատարանի որոշմամբ՝ Քըլըչդարօղլուն պետք է Էրդողանին 15․000 թուրքական լիրա (շուրջ 2500 ԱՄՆ դոլար) բարոյական փոխհատուցում վճարի։
Էրդողանը ընդդիմադիր առաջնորդից 250․000 լիրայի (ավելի քան 41․000 դոլար) փոխհատուցում էր պահանջել՝ 2018թ․ դեկտեմբերի 25-ին ԺՀԿ խորհրդարանական խմբակցության նիստում իր վերաբերյալ վիրավորական արտահայտություններ հնչեցնելու համար։
Անկարայում կայացած եզրափակիչ դատական նիստին ներկա են գտնվել Էրդողանի փաստաբան Թուղբա Սաղլամ Էքերը և Քըլըչդարօղլուի փաստաբան Ջելալ Չելիքը։ Ընդդիմադիր առաջնորդի փաստաբանը պնդել է, որ իր պաշտպանյալի հայտարարությունները պարզապես խիստ քննադատություններ են և որևէ վիրավորանք չեն պարունակում։
Դատարանն, այնուամենայնիվ, մասամբ բավարարել է Թուրքիայի նախագահի հայցը՝ 250․000-ի փոխարեն նշանակելով 15․000 լիրայի փոխհատուցում։
Հետևեք մեզ տելեգրամում
