Թուրքիայի Արտաքին գործերի նախարարությունը Լաչինի միջանցքում առկա իրավիճակի մասին հանդես է եկել հայտարարությամբ:
Հայտարարության մեջ մասնավորապես նշված է.
«Թուրքիան ուշադրությամբ հետևում է Լաչինի ճանապարհի շուրջ տևական վեճերին և հասկանում է Ադրբեջանի օրինական մտահոգությունն այս հարցում։ Ցավոք սրտի, Ադրբեջանի այս վաղուց հնչեցրած մտահոգությունները հաշվի չառնվեցին, և արդյունքում Ադրբեջանը համապատասխան միջոցներ ձեռնարկեց իր ինքնիշխան իրավունքների շրջանակներում։
Թուրքիան կարծում է, որ Լաչինի ճանապարհի շուրջ Ադրբեջանին քննադատության ենթարկելը արդարացում չունի։ Փաստորեն, Լաչինի ճանապարհով բժշկական փոխադրումների ապահովումը և նյութական լայն տեղաշարժի համար այլընտրանքային ուղիների ապահովումը վկայում է Ադրբեջանի առավելագույն ջանքերի մասին։
Մենք ակնկալում ենք, որ Հայաստանը կխուսափի սադրիչ քայլերից և կճանաչի Ադրբեջանի տարածքային ամբողջականությունն ու ինքնիշխանությունը, կաջակցի այլընտրանքային ուղիների օգտագործմանը, ինչպիսին է Աղդամ-Ստեփանակերտ ճանապարհը՝ հայ բնակչության կարիքները բավարարելու համար, և կաջակցի հայ բնակչությանը վերաինտեգրելու Ադրբեջանի ջանքերին։
Թուրքիան կարծում է, որ տարածաշրջանում խաղաղություն և կայունություն ապահովելու համար անհրաժեշտ է պահպանել բարեկամ և եղբայրական Ադրբեջանի տարածքային ամբողջականությունն ու ինքնիշխանությունը, ինչպես նաև ջանքեր գործադրել հումանիտար ոլորտում և խուսափել գործողություններից, որոնք կարող են վատթարացնել իրավիճակը»։
Հետևեք մեզ տելեգրամում
