ԱՄՆ կոնգրեսականը նամակ է հղել Բայդենին՝ Լաչինի միջանցքի ապաշրջափակման վերաբերյալ

ԱՄՆ կոնգրեսական Ադամ Շիֆը Լաչինի միջանցքի ապաշրջափակման հարցում ԱՄՆ միջամտության անհրաժեշտության վերաբերյալ նամակ է ուղղել Միացյալ Նահանգների նախագահ Ջո Բայդենին: Այս մասին կոնգրեսականը տեղեկացրել է X հարթակում գրառում կատարելով և նամակը հրապարակելով:

Նամակում ԱՄՆ նախագահին կոչ է արվել իրականացնել հետևյալ գործողությունները.

«Մինչ նախագահում է Միացյալ Նահանգները, ՄԱԿ-ի Անվտանգության խորհրդի արտահերթ նիստ գումարել Արցախի ճգնաժամի վերաբերյալ:

Ուղղորդել ՄԱԿ-ում ԱՄՆ առաքելությանը ղեկավարել ՄԱԿ-ի Անվտանգության խորհրդի բանաձևը, որը կոչ է անում Ադրբեջանին անհապաղ կատարել Արդարադատության միջազգային դատարանի հրամանները՝ նախատեսելով ՄԱԿ-ի փորձագետների թիմ տեղակայել Արցախում՝ տեղեկատվություն հավաքելու և զեկույց պատրաստելու մարդու իրավունքների և հումանիտար իրավիճակի վերաբերյալ: Նաև պատժել Ադրբեջանին միջազգային իրավունքի և Մարդու իրավունքների համընդհանուր հռչակագրի կոպտագույն խախտումների համար:

Ուղղորդել ԱՄՆ ՄԶԳ-ին (խմբ.՝ USAID) և Պաշտպանության նախարարությանը՝ գնահատելու ԱՄՆ-ի կողմից հնարավոր տարբերակներ՝ ցամաքային կամ օդային ճանապարհով օգնություն տրամադրելու Արցախին՝ կանխելու սովի իրական սպառնալիքը և խուսափելու անմեղ քաղաքացիական անձանց մահերից:

Անձամբ զանգահարել Ալիևին և կոչ անել վերացնել շրջափակումը։ Զգուշացնել նրան, որ կլինեն հետևանքներ, ներառյալ պատժամիջոցների կիրառումը, վիզային սահմանափակումները և ԱՄՆ արտաքին օգնության կրճատումը, եթե շրջափակումը շարունակվի»:

The crisis in Artsakh demands immediate U.S. action.

Today, I urged @POTUS to call an urgent U.N. Security Council meeting to stop the Azeri blockade.

And use every tool available to support the people of Artsakh and stop another genocide from occurring. pic.twitter.com/gFH215MvRb
— Adam Schiff (@RepAdamSchiff) August 14, 2023