ՀՀ արտգործնախարար Արարատ Միրզոյանն ու Իրանի ԱԳ նախարար Ամիր Աբդոլլահիանը հեռախոսազրույց են ունեցել: Այս մասին հաղորդագրություն է տարածել Իրանի արտգործնախարարությունը:
Համաձայն Իրանի ԱԳՆ հաղորդագրության՝ Աբդոլլահիանը կենսական է անվանել Արաքս գետի աղտոտվածության խնդրին հետամուտ լինելու համար մշակված ճանապարհային քարտեզի իրագործումը:
Մատնանշելով հայ-ամերիկյան զորավարժությունները՝ Իրանի արտգործնախարարը շեշտել է, որ տարածաշրջանում ցանկացած օտար ուժի ներկայությունը ավելի է բարդացնում տարածաշրջանում իրավիճակը:
Իրանի արտգործնախարարը կարևորել է հակասությունները երկխոսության և տարածաշրջանային մեխանիզմներով, այդ թվում՝ 3+3 ձևաչափով բանակցություններով կարգավորելու անհրաժեշտությունը:
Իր հերթին ՀՀ ԱԳ նախարար Արարատ Միրզոյանն Իրանի հետ հարաբերությունների զարգացումը կառուցողական ու կարևոր է անվանել:
Միրզոյանը մատնանշել է Ադրբեջանի ԶՈւ տեղաշարժը և անընդունելի է որակել Հարավային Կովկասում սահմանների ցանկացած փոփոխություն: Արաքս գետի աղտոտվածության հարցում նա մատնանշել է երկու երկրների համապատասխան պաշտոնյաների երկխոսությունները:
Միրզոյանը ընդգծել է, որ Հայաստանի տարածքը երբեք հակաիրանական գործողությունների վայր չի լինելու:
Հետևեք մեզ տելեգրամում
