Իրանի ԱԳՆ խոսնակ Նասեր Քանանին անդրադարձել է Իրաքի ու Պակիստանի տարածքի հրթիռակոծմանը՝ հավելելով, որ Իրանի գործողություններն ուղղված չեն այդ երկրների տարածքային ամբողջականության ու ինքնիշխանության դեմ:
«Իրաքյան Քուրդիստանից Իրանի դեմ բացահայտ սպառնալիքներ կան, և Իրանը չի կարող անտարբեր լինել: Իրանի գործողությունն ուղղված է եղել Մոսադի շտաբի դեմ, այլ ոչ թե Իրաքի տարածքային ամբողջականության»,- մամուլի ասուլիսի ժամանակ նշել է Քանանին:
Նա հավելել է, որ Իրաքի ու Պակիստանի հետ Թեհրանի հարաբերություններն ամուր են, և ահաբեկչության դեմ պայքարը համընդհանուր խնդիր է: Խոսնակը հայտնել է, որ Պակիստանի արտգործնախարարը իրանցի պաշտոնակից Ամիր Աբդոլլահիանին հրավիրել է Իսլամաբադ, սակայն այցի ժամկետը դեռ չի որոշվել:
Անդրադառնալով Սիրիայում Իսրայելի հարվածներից իրանցի զինվորականների սպանությանը՝ Քանանին նշել է, որ Իսրայելին պատասխանելու հարցում Թեհրանը ձեռքերը ծալած չի նստելու:
«Իսրայելը տարածաշրջանի անկայունացմանն ու պատերազմում այլ կողմերի ներգրավմանն է հետամուտ:Իրանը սիոնիստական ռեժիմի մշակած չարաբաստիկ ծրագրերի ծուղակը չի ընկնի»,- ասել է Քանանին:
Հետևեք մեզ տելեգրամում
