«Euractiv» լրատվամիջոցը գրում է, որ Ադրբեջանի կառավարությունն ակտիվացրել է քաղաքացիական հասարակության դեմ ճնշումները՝ ՄԱԿ-ի կլիմայական գագաթաժողովին ընդառաջ:
Լրատվամիջոցը մեջբերել է Freedom House-ի մարդու իրավունքների վերաբերյալ զեկույցը՝ նշելով, թե «Ադրբեջանը նույնիսկ միակուսակցական պետություն չէ։ Սա մեկ անձի կամ մեկ ընտանիքի պետություն է»:
Նշվել է, որ վերջին 20 տարիների ընթացքում Ադրբեջանը ժողովրդավարական սկզբունքների և խոսքի ազատությունը հարգելու միջազգային վարկանիշում կայուն անկում է գրանցել: 2024 թվականին Freedom House-ը Ադրբեջանին ներառել է «ոչ ազատ» երկրների շարքում՝ Ազատության համաշխարհային ինդեքսում 100 միավորից 7 միավոր տալով։
«Լրագրողներ առանց սահմանների» կազմակերպության մամուլի ազատության ամենամյա ինդեքսում երկիրը 180 երկրների մեջ ներկայում զբաղեցնում է 164-րդ տեղը։
Լրատվամիջոցը շեշտել է, որ բռնաճնշումները չեն սահմանափակվում միայն անկախ լրատվամիջոցներով և հասարակական կազմակերպություններով։ Օրինակ՝ սույն թվականի մայիսին Միացյալ Նահանգների միջազգային կրոնական ազատության հանձնաժողովը (USCIRF) առաջարկել է, որ ԱՄՆ Պետդեպարտամենտը կրոնական ազատության համակարգված, շարունակական և աղաղակող ոտնահարումներին Բաքվի մասնակցության համար Ադրբեջանն անվանի «առանձնահատուկ մտահոգություն առաջացնող երկիր»:
Կայքը նաև նշել է, որ Ադրբեջանում 254 անձ է դատապարտվել՝ քաղաքական դրդապատճառներով։
Հետևեք մեզ տելեգրամում
