Իրանի ԱԳՆ խոսնակ Նասեր Քանանին հայտարարել է, որ Իսմայիլ Հանիեի սպանությամբ Իսրայելը խախտում է միջազգային օրենքները և կանոնակարգերը:
Նա ընդգծել է, որ Իրանն իրավունք ունի պատժելու Իսրայելին և պաշտպանելու իր ազգային անվտանգությունն ու տարածքային ամբողջականությունը՝ հավելելով, որ իրանական կողմն արդեն ձեռնարկել է անհրաժեշտ իրավական և քաղաքական միջոցառումներ։
Քանանին հայտնել է, որ չորեքշաբթի տեղի կունենա Իսլամական համագործակցության կազմակերպության արտակարգ նիստը Ջեդդայում՝ «Սիոնիստական ռեժիմի» գործողությունները քննարկելու համար:
Ըստ խոսնակի՝ Իրանն իր գործունեությամբ չի ձգտում մեծացնել լարվածությունը տարածաշրջանում, սակայն լարվածությունը մեծացնող ռեժիմը «Սիոնիստական օկուպացիոն ռեժիմն է», և դա պետք է կանխվի միջազգային հանրության աջակցությամբ։
Քանանին համոզմունք է հայտնել, որ Իսրայելը որևէ գործողություն չի ձեռնարկում առանց ԱՄՆ-ի հետ համաձայնեցնելու՝ ընդգծելով, որ, Հանիեյի սպանության հետևում, անկասկած, կանգնած է Իսրայելը, և ԱՄՆ-ը պարտավոր է դադարեցնել «Սիոնիստական ռեժիմին» աջակցել։
Իրանի ԱԳՆ խոսնակը նշել է, որ «Սիոնիստական ռեժիմի» դեմ պայքարը կարևոր է տարածաշրջանի բոլոր երկրների անվտանգության և կայունության համար, և այս ռեժիմի հանդեպ հանդուրժողականությունը կարող է վտանգել բոլորին:
Նա ընդգծել է, որ «Սիոնիստական ռեժիմը» ընդհանուր սպառնալիք է, և դրա դեմ կանխարգելիչ միջոցներ ձեռնարկելն ապահովում է տարածաշրջանի երկրների հավաքական շահերը:
Հետևեք մեզ տելեգրամում
