Թեև ռուսական «Ռոսատոմ»-ը ստացել Է Թուրքիայի Միջուկային կարգավորման գործակալության (NDK) խորհրդի թույլտվությունը այդ երկրում «Աքքույու» ատոմակայանի առաջին էներգաբլոկի շինարարության համար, սակայն այն կարող է հետաձգվել։ Այդ մասին հայտնել է Թուրքիայի էներգետիկայի նախարար Ալփասլան Բայրաքթարը։
Ըստ թուրքական կողմի՝ պատճառը գերմանական «Siemens» ընկերությունն է, որը վերջին ժամանակներս չի մատակարարում անհրաժեշտ կոմպոնենտները ատոմակայանի շինարարության համար։ Մասնագետները կարծում են, որ մատակարարումների խնդիրը կապված է Ռուսաստանի դեմ կիրառվող պատժամիջոցների հետ։
«Իհարկե, լավ կլիներ, որ Աքքույու ԱԷԿ-ը սկսեր գործել հոկտեմբերի 29-ին՝ Հանրապետության օրը, բայց կան մի շարք խնդիրներ ու դժվարություններ, որոնք պետք է հաղթահարել»,- ասել է նախարարը թուրքական «Milliyet» թերթին տված հարցազրույցում։
Թուրքիայի նախագահ Ռեջեփ Թայիփ Էրդողանը հուլիսին նշյալ խնդրի առնչությամբ իր անհանգստություն էր հայտնել Գերմանիայի կանցլեր Օլաֆ Շոլցին։
Հավելենք, որ ծրագրի շրջանակներում կառուցվելու է 4 էներգաբլոկ: Պլանավորվում է ատոմակայանի կառուցումն ավարտել 2024-ին և ամբողջական շահագործման հանձնել 2024թ․ հոկտեմբերի 29-ին՝ Թուրքիայի Հանրապետության հիմնադրման օրը:
Ռուսների կողմից Թուրքիայում կառուցվող ատոմակայանի գործարկումը կարող է հետաձգվել
Հետևեք մեզ տելեգրամում
