Սիրիայի ԱԳ նախարարը Անկարայում խոսել է Սիրիայի տարածքային ամբողջականության մասին

Սիրիայի անցումային կառավարության արտաքին գործերի նախարար Ասադ Շիբանին Անկարայում 3+3 բանակցությունների ավարտից հետո հայտարարել է, որ Սիրիան և Թուրքիան նոր պատմություն կգրեն։

«Սիրիան և Թուրքիան պատմության նոր էջ են բացել»,-ասել է Շիբանին՝ շնորհակալություն հայտնելով Թուրքիային և նրա ժողովրդին «Սիրիայում հեղափոխությունից» ի վեր աջակցության համար։

Շիբանին նաև նշել է, որ այս պատմությունը հիմնված է եղբայրության վրա, և դա կօգնի ապահովել տարածաշրջանում կայունությունն ու անվտանգությունը։ Սիրիայի ԱԳ նախարարն անդրադարձել է նաև երկրի տարածքային ամբողջականության կարևորությանը։

«Մեր տարածքային միասնությունը շատ կարևոր է։ Մենք ցանկանում ենք, որ մեր բոլոր տարածքները լինեն կենտրոնական իշխանության վերահսկողության տակ։ Սա կարևոր է Սիրիայի միասնության և ինքնիշխանության վերականգնման համար։

Նրա խոսքով, շատ մոտ ապագայում Թուրքիայի և Սիրիայի հարաբերությունները ազդակ կստանան տարբեր ոլորտներում։

«Նոր վարչակազմը կարծում է, որ Սիրիայի տարածքը չպետք է վտանգ ներկայացնի Թուրքիայի և թուրք ժողովրդի համար»։

Նշենք, որ 3+3 ձևաչափով հանդիպմանը սիրիական կողմից մասնակցում էին ԱԳ նախարարը, պաշտպանության նախարար Մուրհաֆ Աբու Կասրան և Գլխավոր հետախուզական ծառայության ղեկավար Անաս Հասան Խատաբը։ Թուրքակակ կողմը ներկայացնում էր Թուրքիայի արտաքին գործերի նախարար Հաքան Ֆիդանը, Ազգային պաշտպանության նախարար Յաշար Գյուլերը, Ազգային հետախուզական կազմակերպության (MIT) ղեկավար Իբրահիմ Քալընը։

Այս հանդիպումից հետո Շիբանիին ընդունել է Թուրքիայի նախագահ Ռեջեփ Թայիփ Էրդողանը։ Հանդիպումը մամուլի համար եղել է փակ, ներկա է գտնվել Ֆիդանը։