Թուրքիայի ներքին գործերի նախարար Սուլեյման Սոյլուն հրաժարական է ներկայացրել, որի մասին հայտարարել է Twitter-ում արած գրառմամբ։ Ըստ դրա՝ հրաժարականի պատճառ է դարձել շաբաթվա վերջին Թուրքիայի 30 խոշոր քաղաքում և 1 նահանգում 2-օրյա պարետային ժամ հայտարարելու հետևանքով առաջացած խուճապային վիճակը։
Սոյլուն նշել է, որ պարետային ժամ հայտարարելու որոշման պատասխանատուն ինքն է։ Ըստ Սոյլուի՝ որոշմանը հաջորդող ժամերին ի հայտ եկած պատկերը համադրելի չէ այս ընթացքում կատարյալ կերպով կազմակերպված կառավարման հետ։ Նա ընդգծել է, որ իր երկարամյա փորձը չպետք է թույլ տար, որ նման իրավիճակ ստեղծվեր այս գործընթացում, որի պատասխանատուն մասամբ նաև ինքն է։ Սոյլուն պնդել է, որ պարետային ժամ հայտարարելու որոշումն ընդունվել էր բարի նպատակով՝ հանգստյան օրերին վիրուսի տարածումը փոքր ինչ կասեցնելու համար։
Նշենք, որ ապրիլի 10-ի գիշերը 30 խոշոր քաղաքներում և 1 նահանգում 2-օրյա պարետային ժամ էր հայտարարվել։ Որոշման հրապարակումից հետո այդ շրջանները բնակիչները դուրս էին եկել անհրաժեշտ գնումների, ինչի հետևանքով մեծ կուտակումներ էին առաջացել։
Հետևեք մեզ տելեգրամում
