Թուրքիայի նախագահ Ռեջեփ Թայիփ Էրդողանը չի ընդունել ներքին գործերի նախարար Սուլեյման Սոյլուի հրաժարականի դիմումը։
Ավելի վաղ Սոյլուն իր հրաժարականի մասին տեղեկացրել էր Twitter-ի միջոցով։ Պատճառը շաբաթվա վերջին Թուրքիայի 30 խոշոր քաղաքում և 1 նահանգում 2-օրյա պարետային ժամ հայտարարելու հետևանքով առաջացած խուճապային վիճակն էր։ Նա հայտարարել էր, որ ստեղծված իրավիճակի համար մասամբ պատասխանատու է նաև ինքը, ինչը չպետք է թույլ տար՝ հաշվի առնելով իր երկարամյա աշխատանքային փորձը։
Թուրքիայի նախագահականի հանրային կապերի վարչության հրապարակած հայտարարության համաձայն՝ նախարարը հրաժարականի դիմում է ներկայացրել նախագահ Էրդողանին, սակայն վերջինս այն նպատակահարմար չի համարել։ «Ցանկացած պաշտոնյա իրավասու է հրաժարականի դիմում ներկայացնել, բայց վերջնական որոշումը կայացնում է նախագահը։ Մեր ներքին գործերի նախարարի հրաժարականի դիմումը չի ընդունվել, նա կշարունակի պաշոնավարել», – ասված է հայտարարությունում։
Նշենք, որ Սուլեյման Սոյլուն ներքին գործերի նախարարի պաշտոնում նշանակվել էր 2016գ․ հուլիսի 15-ի հեղաշրջման փորձից անմիջապես հետո․ նախկին նախարար Էֆքան Ալան հրաժարական էր տվել օգոստոսի 31-ին։
Հետևեք մեզ տելեգրամում
