Վրաստանի իշխանությունները պատրաստ են վերականգնել հարաբերությունները Ամերիկայի Միացյալ Նահանգների և Եվրոպայի հետ ու ամեն ինչ սկսել մաքուր էջից: Այս մասին հայտարարել է իշխող «Վրացական երազանք-Ժողովրդավարական Վրաստան» կուսակցության գլխավոր քարտուղար Կախա Կալաձեն։
«ԱՄՆ նախագահը հայտարարեց «խորքային պետության» պարտության մասին: Եվ մենք ցանկանում ենք, որ այս ամենը Վրաստանում արտացոլվի ոչ միայն հայտարարություններով, այլև կոնկրետ քայլերով և գործողություններով: Որպեսզի վերականգնվեն հարաբերությունները և ամեն ինչ՝ գոնե ռազմավարական հարաբերությունները, մենք սկսեինք զրոյից»,-ասել է Կալաձեն՝ ընդգծելով, որ իշխանությունները բազմիցս հայտնել են հարաբերությունները կարգավորելու իրենց պատրաստակամության մասին:
«Այս ամբողջ ընթացքում մենք պաշտպանել ենք մեր շահերը, երկիրը և ոչ մեկին թույլ չենք տվել Վրաստանն օգտագործել իր նպատակների համար: Իհարկե, այս երեք տարիները շատ դժվար էին: Հիշում եք, թե ինչ հայտարարություններ արվեցին. եղան ուղղակի սպառնալիքներ, շանտաժ, որոնք շարունակվում են մինչ օրս»,-ասել է Կալաձեն։
Սակայն, ինչպես նշել է Կալաձեն, իշխանությունները միշտ ամուր կանգնած են եղել ժողովրդի կողքին, դրսևորել ազնվություն, հասարակությանը բացատրել երկրի առջև ծառացած մարտահրավերների իրականությունը և թե ինչ ուժեր են պայքարել պետության դեմ՝ տեղական գործակալների ներգրավմամբ։
«Մարդիկ ամեն ինչ հասկացան, աջակցեցին մեզ, և մենք միասին կարողացանք խուսափել երկրի համար շատ մեծ աղետից»,- ընդգծել է Կալաձեն։
Հետևեք մեզ տելեգրամում
