Թեհրանում Թուրքիայի դեսպանին հրավիրել են Իրանի ԱԳՆ, որտեղ նրան ընդունել է Իրանի արտաքին գործերի նախարարի օգնական Մահմուդ Հայդարին։
Հանդիպման ընթացքում Հայդարին, անդրադառնալով Թուրքիայի ԱԳ նախարարի վերջին հայտարարություններին, ընդգծել է երկկողմ հարաբերություններին վնասող հայտարարություններից խուսափելու անհրաժեշտությունը։ Նա նաև նշել է, որ իսրայելական ռեժիմի շարունակական ագրեսիան և ընդլայնողական քաղաքականությունը տարածաշրջանի կայունության ու անվտանգության ամենամեծ սպառնալիքն են։
Իր հերթին, Թեհրանում Թուրքիայի դեսպան Հիջաբի Քառլանքիչը վերահաստատել է իր երկրի դիրքորոշումը՝ Իրանի հետ բարիդրացիական հարաբերությունների պահպանման և ընդլայնման հարցում։ Նա ընդգծել է, որ Թուրքիան և Իրանը, որպես տարածաշրջանի կարևոր երկրներ, պետք է սերտորեն համագործակցեն՝ երկկողմ հարաբերությունները զարգացնելու, տարածաշրջանային կապերը ամրապնդելու և առկա սպառնալիքները հաղթահարելու համար։ Քառլանքիչը նաև հայտնել է, որ Իրանի ԱԳՆ-ի դիրքորոշումները կփոխանցի իր երկրի արտաքին գործերի նախարարությանը։
Հիշեցնենք, որ Ֆիդանը արաբական «Al Jazeera» հեռուստաընկերությանը տված հարցազրույցում խոսել էր Իրանի տարածաշրջանային քաղաքականության մասին՝ հայտարարելով, որ Իրանը օգնում է իրենց կողմից ահաբեկչական ճանաչված «Քուրդիստանի բանվորական կուսակցությանը» (ՔԲԿ-PKK), «Սիրիայի դեմոկրատական ուժերին» (SDG) և «Սիրիայի քրդական ինքնապաշտպանական ուժերին» (YPG):
«Իրանի նախկինում վարած քաղաքականության շարունակականությունը ճիշտ ճանապարհ չի լինի: Իրանը նոր ժամանակաշրջանում տեղի ունեցած դեպքերից մեծ դասեր է քաղել: Այլևս հին սխալները շարունակելու ժամանակը չէ»,-հայտարարել էր նա: Այս հայտարարությունները դժգոհություն էին առաջացրել իրանական վերնախավում:
Հետևեք մեզ տելեգրամում
