Էրդողանը կարող է Պուտինի հետ հեռախոսով քննարկել ուկրաինական կարգավորման հարցը

Թուրքիայի նախագահ Ռեջեփ Թայիփ Էրդողանը կարող է այս շաբաթ հեռախոսային բանակցություններ վարել իր ռուս գործընկեր Վլադիմիր Պուտինի հետ։ Այս մասին գրում է կառավարամետ Hürriyet թերթը՝ վկայակոչելով իր աղբյուրներին։

ԱՄՆ նախագահ Դոնալդ Թրամփի հետ հեռախոսազրույցներից հետո, որոնց ընթացքում քննարկվել են ուկրաինական հակամարտության կարգավորումը և խաղաղ բանակցություններ վարելու հնարավորությունը, Էրդողանը կարող է հեռախոսազրույց ունենալ Պուտինի հետ, գրում է կայքը։

Էրդողանը Թրամփի հետ զրուցել էր մարտի 16-ին։ Ինչպես հայտնել է Թուրքիայի ղեկավարի վարչակազմը, նա աջակցություն է հայտնել Ուկրաինայում իրավիճակի կարգավորմանն ուղղված Վաշինգտոնի ջանքերին։

Անկարայում, ինչպես նշում է Hürriyet-ը, գոհ են Թուրքիայի և ԱՄՆ-ի նախագահների բանակցությունների արդյունքներից։ Տեղական լրատվամիջոցներն ավելի վաղ հայտնել էին ապրիլին Էրդողանի՝ ԱՄՆ այցի հնարավորության մասին, սակայն, ըստ հրապարակման, այս տեղեկությունը դեռ չի հաստատվել։