Թուրքիա–Իրաք կարևոր հանդիպում է կայանալու

Ապրիլի 17-ին Բաղդադում տեղի է ունենալու Թուրքիա-Իրաք համատեղ հանդիպում, որի ընթացքում քննարկվելու են մի շարք կարևոր հարցեր՝ սահմանային անվտանգություն, ահաբեկչության դեմ պայքար, տնտեսական համագործակցություն և ենթակառուցվածքային նախագծեր։ Ինչպես հայտնում է CNNTURK (https://www.cnnturk.com/video/dunya/turkiye-irak-arasinda-kritik-toplanti-ankara-hangi-mesajlari-verecek-2271205) լրատվականը, Անկարան մտադիր է հանդիպման ընթացքում շեշտել տարածաշրջանային կայունության ապահովման, PKK-ի դեմ պայքարի և թուրք-իրաքյան հարաբերությունների ընդլայնման կարևորությունը։

Սա դիվանագիտական ակտիվության նոր փուլ է, որին նախորդել էր Անթալիայում անցկացված բարձր մակարդակի անվտանգային թեմաներով հանդիպումը։ Ըստ կողմերի համատեղ հայտարարության՝ PKK-ն համարվում է երկու երկրների համար ընդհանուր սպառնալիք, և կազմակերպությունը պետք է հրաժարվի զինված պայքարից։

Բաղդադում կայանալիք հանդիպման ընթացքում Թուրքիայի արտգործնախարարի տեղակալ Նուհ Յըլմազը և իրաքցի գործընկեր Մուհամմեդ Հուսեյն Բահր ալ-Ուլումը կքննարկեն նաև երկկողմ հարաբերությունների զարգացման հնարավորությունները, ինչպես նաև՝ «Զարգացման ճանապարհ» ռազմավարական ծրագրի առաջընթացի հարցը։

Հիշեցնենք, որ «Զարգացման ճանապարհ» նախագիծը ներառում է բազմապիսի ենթակառուցվածքային և տնտեսական նախագծեր, որոնք նպատակ ունեն խթանել տնտեսական աճը, նպաստել տարածաշրջանային կայունությանն ու համագործակցությանը, ինչպես նաև բարելավել առևտրային կապերը՝ Թուրքիա-Իրաք համատեղ գործողությունների միջոցով։