Հութիները հայտարարել են Իսրայելի Բեն-Գուրիոն օդանավակայանի վրա հարձակման մասին

Եմենի հյուսիսում իշխող «Անսար Ալլահ» շարժումը (հութիներ) հայտնել է, որ հրթիռային հարված է հասցրել Թել Ավիվի Բեն Գուրիոն օդանավակայանի տարածքում գտնվող ռազմական օբյեկտին՝ ի պատասխան ԱՄՆ-ի կողմից Եմենի արևմուտքում նավթային նավահանգստի ռմբակոծման, որի հետևանքով, ըստ որոշ աղբյուրների, զոհվել է շուրջ 75 մարդ։

Հութիների Telegram ալիքում տարածված հաղորդագրության համաձայն՝ Եմենի ռազմաօդային ուժերը «Զուլֆիքար» բալիստիկ հրթիռով հարվածել են Բեն Գուրիոնի օդանավակայանի ռազմական օբյեկտին։

Բացի դրանից, հութիները հաղորդել են,մայրաքաղաք Սանաի երկնքում ամերիկյան անօդաչու սարքի խոցման մասին։

Հիշեցնենք, ապրիլի 18-ի առավոտյան ԱՄՆ-ի ռմբակոծիչների կողմից առնվազն 14 հարված է հասցվել Հոդեյդա նավահանգստին, որի հետևանքով զոհվել է 74 մարդ, վիրավորվել՝ ավելի քան 170-ը։