Իրանի նախագահ Մասուդ Փեզեշքիանը Բաքու այցի շրջանակներում հանդիպել է Ադրբեջանում բնակվող իրանցիների հետ։ Նա ընդգծել է, որ տարածաշրջանում բոլորը միևնույն մշակութային արմատներից են սերում։
«Երկրագնդի վրա մենք բոլորս մեկ միասնական արմատից ենք։ Երկրագունդը և տունը, որտեղ մենք ապրում ենք, պատկանում է մեզ բոլորիս և պետք է խաղաղության ու առողջ հարաբերությունների համար հարթակ ստեղծենք։ Բնական է՝ նրանք, ովքեր մեր երկրի հետ ֆիզիկական և մշակութային հարևանությանբ են գտնվում, մեզ համար առաջնահերթություն են։ Ես այստեղ եմ եկել այն ուղերձը փոխանցելու, որ մենք մեկ արմատից ու ընտանիքից ենք, անգամ մեր գույնն ու ռասան են նույնը։ Մենք միասին ենք եղել, և եթե սահմանը վերցվի, երկու կողմն էլ ցեղակից ու ազգակից են եղել։ Նախկինում սահման է ստեղծվել, հետո կռիվ ու հակասություններ ենք ստեղծել, իհարկե, այս սահմանը մեզ համար գծել են, մենք էլ չենք ասում, թե սահման չլինի, բայց բոլոր տարածքների պահպանմամբ՝ մենք կարող ենք հումանիզմի,եղբայրության, ջերմության հիման վրա էլ բարեկամական կապեր ունենալ։ Մենք կջանանք վերացնել մեր երկրի կողմից առկա խնդիրները։ Վստահ եմ՝ եղբայրս՝ Իլհամ Ալիևը ևս համագործակցության զարգացման համար հարմար հարթակ կստեղծի։ Տարածաշրջանում փոփոխությունների ու վերափոխումների ոսկե հնարավորություն ունենք։ Կարող ենք տարածաշրջանում և Մերձավոր Արևելքում նոր քաղաքակրթություն ստեղծել։ Կռվի փոխարեն պետք է վերկենդանացնենք վստահությունը։ Կարող ենք միմյանց օգնել և միմյանց դիրքերը բարձրացնել, միմյանց խնդիրները լուծել»,-ասել է Իրանի նախագահը:
Փեզեշքիանն ընդգծել է, որ հետամուտ են Ադրբեջանի հետ պայմանավորվածությունների կատարմանն ու առկա խնդիրների լուծմանը։
Հետևեք մեզ տելեգրամում
