Իսրայելի վարչապետ Բենիամին Նեթանյահուն և պաշտպանության նախարար Իսրայել Կացը համատեղ հայտարարություն են տարածել՝ հայտարարելով Դամասկոսում նախագահական պալատի մոտ գտնվող թիրախը հարվածելու մասին։
«Սա հստակ ազդանշան է սիրիական ռեժիմին։ Մենք թույլ չենք տա զորքեր ուղարկել Դամասկոսից հարավ կամ որևէ սպառնալիք ներկայացնել դրուզ համայնքի համար»,-մեջբերում է The Times of Israel կայքը հայտարարությունից մի հատված։
«Երբ նա՝ Սիրիայի առաջնորդ Ահմեդ ալ-Շարաան, առավոտյան արթնանա և տեսնի Իսրայելի ռազմաօդային ուժերի կործանիչների հարվածի արդյունքները, կհասկանա, որ Իսրայելը վճռականորեն տրամադրված է կանխելու Սիրիայում դրուզներին հասցվող վնասը։ Նրա պարտականությունն է պաշտպանել Դամասկոսի արվարձանների դրուզներին ջիհադիստ ապստամբների հարձակումներից և հնարավորություն տալ Սուեյդայում և Ջաբալ ալ-Դրուզում բնակվող հարյուր հազարավոր դրուզներին ինքնուրույն պաշտպանվել, և ոչ թե ջիհադիստական ուժեր ուղարկել գյուղեր։ Մեր պարտականությունն է պաշտպանել դրուզներին՝ հանուն Իսրայելում ապրող դրուզ-եղբայրների, հանուն նրանց՝ պետությանը հավատարիմ լինելու և Իսրայելի անվտանգության ապահովման գործում նրանց հսկայական ներդրման համար»,-ասված է Կացի հայտարարության մեջ։
Հիշեցնենք, որ ապրիլի 30-ի գիշերը Դամասկոսի արվարձաններում, որտեղ հիմնականում դրուզներ են ապրում, բախումներ են սկսվել քաղաքի վրա հարձակված զինված ջոկատների և դրուզների ինքնապաշտպանության մարտիկների միջև։ Լոնդոնում տեղակայված Մարդու իրավունքների պաշտպանության սիրիական կենտրոնի տվյալներով՝ վերջին բախումների հետևանքով առնվազն 101 մարդ է զոհվել։
The Times of Israel կայքի փոխանցմամբ՝ մայիսի 2-ին Դամասկոսի արվարձանային Ջարամանա շրջանում գտնվող դրուզների ներկայացուցիչները համաձայնագիր են ստորագրել սիրիական իշխանությունների ներկայացուցիչների հետ՝ դրուզների կողմից պահվող ծանր զենքը կառավարությանը հանձնելու և տարածքում կառավարության անվտանգության ուժերն ամրապնդելու վերաբերյալ։
Հետևեք մեզ տելեգրամում
