Վրաստանի խորհրդարանի նախագահ Շալվա Պապուաշվիլին Բուդապեշտում կայանալիք գագաթնաժողովում մի շարք երկկողմ հանդիպումներ կանցկացնի, որոնց ընթացքում կքննարկվի նաև Վրաստանի և Եվրամիության հարաբերությունների վերագործարկման հարցը, հայտարարել է եվրաինտեգրման կոմիտեի ղեկավար Լևան Մախաշվիլին։
Պապուաշվիլին Բուդապեշտում է՝ մասնակցելու ԵՄ անդամ պետությունների և գործընկեր երկրների խորհրդարանների խոսնակների համաժողովին։ Վրաստանի խորհրդարանի ղեկավարը ելույթ կունենա միջոցառման երկու նիստերում։
«Այս գագաթնաժողովի հիմնական նպատակն ու թեման է քննարկել, թե ինչպես է ԵՄ-ն իրեն տեսնում այսօր ամբողջ աշխարհում, ինչպես նաև Միության ներսում, ի՞նչ ինստիտուցիոնալ որոշումներ կարելի է կայացնել և ինչպե՞ս լավագույնս հարգել ազգային պետությունների ինքնավարությունը, նրանց ինքնությունը, ավանդույթները այնպես, որ պահպանվի դրանց արդիականությունը թե՛ համաշխարհային դերակատարների, թե՛ սեփական քաղաքացիների համար»,-ասել է Մախաշվիլին։
Այցի շրջանակներում նախատեսված են նաև վրացական պատվիրակության երկկողմ հանդիպումներ ԵՄ անդամ ինչպես խոշոր, այնպես էլ փոքր պետությունների խորհրդարանների նախագահների հետ։ Երկկողմ հարցերից բացի, Մախաշվիլիի խոսքով, քննարկման թեմաները կլինեն կրթությունը, առևտուրը և տնտեսությունը, ինչպես նաև Վրաստան-ԵՄ հարաբերությունները։
Հետևեք մեզ տելեգրամում
