Ստամբուլի բանակցությունները կարող են հիմք դառնալ Ուկրաինայի հարցի կարգավորման համար․ Ֆիդան

Թուրքիայի արտաքին գործերի նախարար Հաքան Ֆիդանը հույս ունի, որ Ստամբուլում Ռուսաստանի և Ուկրաինայի պատվիրակությունների միջև կայացած բանակցությունները կդառնան համապարփակ հրադադարի և հակամարտության խաղաղ կարգավորման հիմք։ Այս մասին նա հայտարարել է Բուդապեշտում Թյուրքական պետությունների կազմակերպության (ԹՊԿ) անդամ-երկրների արտաքին գործերի նախարարների խորհրդի նիստի ժամանակ։

«Մենք հույս ունենք, որ Ստամբուլում կայացած բանակցությունները կհարթեն ճանապարհը համապարփակ հրադադարի և ապագայում արդար ու երկարատև խաղաղության համար»,-ասել է Ֆիդանը։

Հիշեցնենք, որ Ռուսաստանի և Ուկրաինայի միջև բանակցությունները տեղի ունեցան մայիսի 16-ին Ստամբուլում։ Արդյունքում, Մոսկվան և Կիևը համաձայնեցին գերիներ փոխանակել «1000-ը 1000-ի դիմաց» բանաձևով, ներկայացնել ապագա հնարավոր հրադադարի իրենց տեսլականը՝ մանրամասն նկարագրելով այն, և շարունակել բանակցային գործընթացը։