Մշակույթի, սպորտի և երիտասարդության հարցերով եվրահանձնակատար Գլեն Միկալեֆը դատապարտել է Գազայում տիրող ծանր մարդասիրական իրավիճակը և հայտարարել, որ մարզական աշխարհը պետք է բարձրաձայնի տեղի ունեցողի մասին։
«Երբ խոսքը սպորտի մասին է, կարծում եմ, որ սպորտային միջոցառումներում տեղ չպետք է ունենան նրանք, ովքեր չեն կիսում մեր արժեքները»,-Politico-ին ասել է նա՝ առանց Իսրայելին ուղղակիորեն անվանելու, երբ հարցրել են, թե արդյոք երկիրը պետք է սպորտային պատժամիջոցների ենթարկվի Գազայի հատվածում պատերազմի պատճառով։
Միկալեֆը սպորտը անվանել է «խաղաղությունը խթանելու գործիք, որի միջոցով առաջ են մղվում մարդու իրավունքները»։ Նրա խոսքով՝ «սպորտային շարժումը ինքնավար է և ինքնուրույն որոշումներ է կայացնում»։
«Մենք պարտականություն ունենք, պատասխանատվություն ունենք խոսելու այս հարցերի մասին»,-հավելեց եվրահանձնակատարը։
Politico-ի տվյալներով՝ սպորտային աշխարհում բազմիցս կոչեր են հնչել բոյկոտելու Իսրայելի մասնակցությունը միջազգային մրցումներին՝ սկսած Օլիմպիական խաղերից մինչև Աշխարհի գավաթ, բայց նման առաջարկները մինչ օրս մեծ մասամբ մերժվել են։
Ինչպես հաղորդում է Ynet պորտալը, ԵՄ մի շարք երկրներ պլանավորում են պահանջել, որ միջազգային ֆեդերացիաները որակազրկեն իսրայելցի մարզիկներին և թիմերին մրցումներից՝ Մերձավոր Արևելքում տեղի ունեցող իրադարձությունների պատճառով։
Հետևեք մեզ տելեգրամում
