Հայաստանը դիվանագիտական ուղիներով խորհրդակցություններ է անցկացնում Ադրբեջանի հետ՝ խաղաղության պայմանագիր կնքելու համար։ Այս մասին լրագրողների հետ զրույցում հայտարարել է ՀՀ Անվտանգության խորհրդի քարտուղար Արմեն Գրիգորյանը։
«Կողմերը հայտարարել են, որ պայմանագրի նախագիծը համաձայնեցված է, և մնում է միայն այն ստորագրել։ Այժմ մենք դիվանագիտական ուղիներով խորհրդակցություններ ենք անցկացնում Ադրբեջանի հետ՝ խաղաղության պայմանագիր կնքելու համար», – ասել է նա՝ ևս մեկ անգամ նշելով, որ Երևանը շարունակում է ջանքեր գործադրել փաստաթղթի ստորագրումն ապահովելու համար։
ԱԽ քարտուղարը նաև հայտարարել է, որ սահմանազատման գործընթացը կասեցված չէ, և փոխվարչապետների մակարդակով աշխատանքային խմբերը կապի մեջ են և շարունակում են աշխատել։
«Վերջին պայմանավորվածությունն այն է, որ Հայաստան-Վրաստան-Ադրբեջան սահմանակետից մի քիչ ներքև է շարունակվելու սահմանազատումը, և փորձելու են բանակցությունների միջոց հասնել լուծումների, որ շարունակվի սահմանազատման գործընթացը։ Այդ ուղղությամբ մեծ ջանքեր են գործադրվում, որ առաջ ընթանանք»,- ասել է նա։
Հետևեք մեզ տելեգրամում
