Չիլիի նախագահ Գաբրիել Բորիչը չի ընդունել ԱՄՆ պետքարտուղար Մարկո Ռուբիոյի հեռախոսազանգը, ով ցանկանում էր քննարկել հարավամերիկյան երկրի լարված հարաբերությունները Իսրայելի հետ։ Այս մասին հաղորդում է La Tercera թերթը։
Թերթի տվյալներով՝ Ռուբիոն ցանկանում էր կապ հաստատել Բորիչի հետ մայիսի 30-ին, սակայն պետության ղեկավարը չի ընդունել զանգը՝ վկայակոչելով կառավարության աշխատանքի վերաբերյալ տարեկան հրապարակային զեկույցի նախապատրաստական աշխատանքները, որը նա ներկայացրել էր հունիսի 1-ին։ Նրա փոխարեն ԱՄՆ պետքարտուղարի հետ խոսել է Չիլիի արտաքին գործերի նախարար Ալբերտո Վան Կլավերենը։
Թերթը գրում է, որ Ռուբիոն ցանկացել է Չիլիի նախագահի հետ քննարկել մաքսատուրքերի հարցը և արտահայտել Վաշինգտոնի մտահոգությունն առ այն, որ հարավամերիկյան երկրի իշխանությունները քննարկում են Իսրայելի հետ դիվանագիտական հարաբերությունները խզելու հնարավորությունը։ Պատճառը Գազայի հատվածում ստեղծված իրավիճակն է։
Հոդվածի հրապարակումից հետո Չիլիի արտաքին գործերի նախարարը հաստատեց, որ ինքը խոսել է Ռուբիոյի հետ՝ Բորիչի փոխարեն։ «Քանի որ նախագահը բացակայում էր, և ես սա չեմ համարում ԱՄՆ պետքարտուղարի հասցեին ուղղված վիրավորանք, մենք զրույց ունեցանք, որի մանրամասները չեմ կարող բացահայտել»,-ասել է Վան Կլավերենը։ Նրա խոսքով՝ զրույցը բարեկամական էր։
Հետևեք մեզ տելեգրամում
