ԱՄՆ պետքարտուղար Մարկո Ռուբիոն հայտարարել է, որ Իսրայելը «միակողմանի գործողություններ է ձեռնարկել Իրանի դեմ», և նախազգուշացրել է, որ Իրանն, ի պատասխան այդ հարվածների, չթիրախավորի ամերիկյան ուժերը։ Ռուբիոյի խոսքով՝ Իսրայելն ԱՄՆ-ին ասել է, որ իր համոզմամբ՝ հարվածներն անհրաժեշտ են ինքնապաշտպանության համար։ «Արմենպրես»-ի փոխանցմամբ՝ այս մասին հաղորդում է The Associated Press գործակալությունը։
«Այսօր Իսրայելը միակողմանի գործողություններ ձեռնարկեց Իրանի դեմ։ Մենք ներգրավված չենք Իրանի դեմ հարվածներին, և մեր գերակա խնդիրն է տարածաշրջանում ամերիկյան ուժերի պաշտպանությունը։ Իսրայելը մեզ տեղեկացրել է, որ կարծում է, որ այս գործողությունն անհրաժեշտ էր իր ինքնապաշտպանության համար։ Նախագահ Թրամփը և վարչակազմը ձեռնարկել են բոլոր անհրաժեշտ քայլերը՝ մեր ուժերը պաշտպանելու համար, և սերտ կապի մեջ են մեր տարածաշրջանային գործընկերների հետ։ Թույլ տվեք հստակեցնել՝ Իրանը չպետք է թիրախավորի ԱՄՆ շահերը կամ անձնակազմը», – հայտարարել է Մարկո Ռուբիոն։
Իսրայելը վաղ առավոտյան հարվածներ է հասցրել Իրանին։ Մայրաքաղաք Թեհրանում պայթյուններ են լսվել։ Հարվածներ են հասցվել քաղաքի բնակելի շենքերին։ Պայթյուններ են լսվել նաև Իրանի հյուսիսային Սպանահի նահանգում։ Հարվածների հետևանքով զոհվել է Իսլամական հեղափոխության պահապանների կորպուսի գլխավոր հրամանատար, գեներալ-մայոր Հոսեյն Սալամին, ինչպես նաև այլ հրամանատարներ և միջուկային ոլորտի գիտնականներ։ Իրանը խոստացել է կոշտ պատասխան տալ այս հարվածներին։
Հետևեք մեզ տելեգրամում
