Թուրքիայի նախագահի աշխատակազմի հանրային կապերի վարչությունը հայտարարություն է տարածել Ստամբուլում ՀՀ վարչապետ Նիկոլ Փաշինյանի ու Թուրքիայի նախագահ Ռեջեփ Թայիփ Էրդողանի միջև կայացած հանդիպման վերաբերյալ։
Նշվել է, որ Էրդողանը աշխատանքային այցով Թուրքիայում գտնվող ՀՀ վարչապետ Նիկոլ Փաշինյանին դիմավորել է Դոլմաբահչեի նախագահական նստավայրում։
«Պաշտոնական ընդունելությունից հետո նախագահ Էրդողանն ու վարչապետ Փաշինյանը միմյանց են ներկայացրել իրենց պատվիրակությունների անդամներին և անցել բանակցությունների։
Հանդիպման ընթացքում քննարկվել են նախևառաջ Թուրքիայի և Հայաստանի միջև շփումները, ինչպես նաև Հարավային Կովկասում խաղաղության ու երկխոսության գործընթացը և տարածաշրջանին վերաբերող ընթացիկ զարգացումները։
Նախագահ Էրդողանը կարևորել է ներկա իրավիճակում Ադրբեջանի և Հայաստանի միջև խաղաղ բանակցություններում ձեռք բերված համաձայնությունը։ Նա նշել է, որ Թուրքիան շարունակելու է ամեն կերպ աջակցել տարածաշրջանի զարգացմանն ուղղված ջանքերին՝ հիմնված փոխշահավետության(win-win) սկզբունքի վրա։
Հանդիպմանը քննարկվել են նաև Թուրքիայի և Հայաստանի միջև հարաբերությունների կարգավորման գործընթացի շրջանակում հնարավոր քայլերը։
Նախագահ Էրդողանը նշել է, որ Թուրքիան օգտագործում է դիվանագիտության բոլոր միջոցները՝ ոչ միայն Կովկասում, այլև ամբողջ տարածաշրջանում կայունություն հաստատելու համար, և շարունակում է կապերը առաջնորդների հետ՝ վերացնելու Իսրայելի կողմից Իրանի վրա հարձակումների հետևանքով տարածաշրջանում առաջացած ռիսկերը։
Հանդիպմանը մասնակցել են նաև Թուրքիայի ԱԳ նախարար Հաքան Ֆիդանը և ՀՀ ԱԳ նախարար Արարատ Միրզոյանը»։
Հետևեք մեզ տելեգրամում
