Միացյալ Նահանգներն աջակցում է Հարավային Կովկասում խաղաղության և կայունության խթանման ջանքերին։ Այս մասին հայտարարել է ԱՄՆ Պետդեպարտամենտի խոսնակ Թեմի Բրուսը՝ ի պատասխան ադրբեջանցի լրագրողի հարցին՝ արդյոք կապ կա պետքարտուղար Մարկո Ռուբիոյի հայտարարության և Աբու Դաբիում Հայաստանի և Ադրբեջանի ղեկավարների հանդիպման միջև։ ԱՄՆ պետքարտուղար Մարկո Ռուբիոն հուլիսի 9-ին լավատեսություն էր հայտնել Հայաստանի և Ադրբեջանի միջև հնարավոր խաղաղության համաձայնագրի վերաբերյալ՝ ենթադրելով, որ այն կարող է շուտով կնքվել ԱՄՆ աջակցությամբ։
Շարունակելով հարցի պատասխանը՝ Թեմի Բրյուսը շեշտել է, որ Թրամփի վարչակազմն աշխատում է խաղաղության համար։
«Մենք ընդհանուր առմամբ հետևում ենք մամուլի լուսաբանմանը և որևէ լրացուցիչ տեղեկատվություն չունենք։ Սակայն, ինչպես գիտեք, նախագահ Թրամփի և պետքարտուղար Ռուբիոյի մոտեցումն ինքնին խոսում է իր մասին. այս վարչակազմն աշխատում է խաղաղության համար։ Այդ ջանքերը չեն նվազել», – ասել է Բրյուսը։
Հուլիսի 10-ին Աբու Դաբիում կայացած 5 ժամանոց երկկողմ, առանց միջնորդի հանդիպման ժամանակ Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը քննարկել են Հայաստան-Ադրբեջան միջպետական հարաբերությունների կարգավորման օրակարգի տարբեր ասպեկտներ։
Երևանն ու Բաքուն հաստատել են, որ երկկողմ բանակցությունները հարաբերությունների կարգավորման գործընթացի բոլոր հարցերն արդյունավետորեն հասցեագրելու ամենաարդյունավետ ձևաչափն են։ Այդ հիմքով պայմանավորվածություն է ձեռք բերվել շարունակել արդյունքին միտված երկխոսությունը։
Civilnet.am
Հետևեք մեզ տելեգրամում
