Իսրայելի բարձրաստիճան անանուն պաշտոնյան ԱՄՆ Կոնգրեսին կոչ է արել արգելափակել Թուրքիային F-35 կործանիչների վաճառքը: Այդ մասին նա հայտնել է Breitbart News-ին տված հարցազրույցում, նախազգուշացնելով, որ Անկարայի հավակնությունները տարածաշրջանում երկարաժամկետ սպառնալիք են ներկայացնում Իսրայելի ազգային անվտանգության համար։
Breitbart News-ին տված հարցազրույցում նա ընդգծել է, որ ամերիկյան այդ ինքնաթիռները, որոնք Իսրայելում հայտնի են «Ադիր» անվանումով, առանցքային դեր են խաղացել Իրանի հետ վերջին 12-օրյա հակամարտությունում։ Ըստ իսրայելական կողմի, Թուրքիայի նման զենքի հասանելիությունը կարող է ապակայունացնել տարածաշրջանը։ Մասնավորապես, պաշտոնյան հիշեցրել է Անկարայի «նեոօսմանյան վերածննդի» և Երուսաղեմի նկատմամբ վերահսկողության ձգտման մասին հայտարարությունները։
Թեև մոտ ապագայում Թուրքիայի հետ ուղիղ ռազմական բախումը քիչ հավանական է, իսրայելական աղբյուրը չի բացառել նման սցենարը ապագայում։ Նա նշել է, որ Իսրայելը նախընտրում է խուսափել հակամարտությունից, բայց պատրաստ է գործել անհրաժեշտության դեպքում, հատկապես սիրիական ուղղությամբ, որտեղ թուրքական ռազմական ակտիվությունը, ըստ նրա, կարող է ուղղված լինել ոչ միայն «Իսլամական պետություն» խմբավորման զինյալների, այլև Իսրայելի դեմ։
Հետևեք մեզ տելեգրամում
