Վրաստանի ֆինանսների նախարարության եկամուտների ծառայությունն արձագանքել է վրացական լրատվամիջոցների և ընդդիմադիր կուսակցությունների ներկայացուցիչների, ինչպես նաև նախկին նախագահ Սալոմե Զուրաբիշվիլիի՝ Վրաստանում հայկական բեռների (ներառյալ գազային ապրանքների) արգելափակման վերաբերյալ հայտարարություններին։
«Ենթադրյալ «արգելափակման» վերաբերյալ արված հերթական ապատեղեկատվական հայտարարությունը լիակատար սուտ է, ծառայում է հանրությանը մոլորեցնելուն, գործակալությանը վարկաբեկելուն և խնդիրը քաղաքական հարցի վերածելու փորձին: Ցանկանում ենք պարզաբանել, որ բեռնաշրջանառության աճի պայմաններում միջազգային բեռնափոխադրումներին մասնակցող տրանսպորտային միջոցների բոլոր մաքսային ընթացակարգերը կատարվում են հատուկ/ակտիվ ռեժիմով՝ դրանց անխափան տարանցումն ապահովելու համար»,- ասված է հաղորդագրության մեջ։
Եկամուտների ծառայությունից հավելել են նաև, որ շրջանառվող լուսանկարներն ու տեսանյութերը, այդ թվում գազային արտադրանքով բեռնված տրանսպորտային միջոցները չեն արտացոլում մաքսային կետերում, այդ թվում՝ Կազբեգիի մաքսային անցակետում պատկերը։ Եկամուտների ծառայությունից հաստատել են սակայն, որ վերոնշյալ մաքսակետում «կարճ ժամանակահատված բեռնատարների տեղաշարժի աննշան ուշացում է եղել, որն ամբողջությամբ վերացվել է»։
Վրացական պաշտոնական հաղորդագրության մեջ նշվել է նաև, որ նախորդ տարի Կազբեգիի մաքսային անցակետով երկու ուղղությունով էլ մաքսային ձևակերպումներ են իրականացվել 364,670 բեռնատարի համար։
Հետևեք մեզ տելեգրամում
