Իրանի արտաքին գործերի նախարարության խոսնակ Էսմայիլ Բաղաեին մամուլի ասուլիսի ընթացքում անդրադարձել է Զանգեզուրի միջանցքի վերաբերյալ Ադրբեջանի նախագահ Իլհամ Ալիևի հայտարարություններին և նշել է, որ տարածաշրջանային երթուղիների ստեղծումը ոչ մի կերպ չպետք է խաթարեն որևէ երկրի ինքնիշխանությունը։
«Մենք հստակ հայտնել ենք մեր դիրքորոշումները այդ տարածքում կապերի և անցումների վերաբերյալ։ Չնայած մենք աջակցում ենք տարածաշրջանի երկրների միջև հարաբերությունների ընդլայնմանը, մենք միշտ ընդգծել ենք, որ այդ միջոցառումները, այդ երթուղիների ստեղծումը ոչ մի կերպ չպետք է խաթարեն որևէ երկրի ինքնիշխանությունը, տարածքային ամբողջականությունը, միջազգայնորեն ճանաչված սահմանները կամ փոփոխություն առաջացնեն տարածաշրջանի աշխարհաքաղաքականությունում։ Որոշ դեպքերում կովկասյան տարածաշրջանի այլ երկրների պաշտոնյաների հայտարարությունները կարող են սխալ մեկնաբանվել լրատվամիջոցներում։ Մեր դիրքորոշումը հստակ է, և մենք այն բազմիցս հայտարարել ենք»,-ընդգծել է Բաղաեին։
Հետևեք մեզ տելեգրամում
