Անկարայում կկայանա Տոկաև-Էրդողան հանդիպումը

Ղազախստանի նախագահը պաշտոնական այցով կմեկնի Թուրքիա, որտեղ հուլիսի 29-ին նախատեսվում է անցկացնել Բարձր մակարդակի ռազմավարական համագործակցության խորհրդի հինգերորդ նիստը։

Անկարայում Տոկաևը և Թուրքիայի նախագահ Ռեջեփ Թայիփ Էրդողանը կանցկացնեն բանակցություններ՝ քննարկելով երկու երկրների միջև ռազմավարական գործընկերության ամրապնդման հարցերը։

Խորհրդի նիստում կքննարկվեն Թուրքիայի և Ղազախստանի միջև առևտրատնտեսական համագործակցությունը, ներդրումները, Միջին միջանցքի զարգացումը, պաշտպանական արդյունաբերության արդիականացումը, մեդիանախաձեռնությունների աջակցությունն ու մշակութային նախագծերի խթանումը։

Հիշեցնենք, որ խորհրդի նախորդ նիստը կայացել էր երեք տարի առաջ, որի ընթացքում կողմերը համաձայնեցրել էին մի շարք նախաձեռնություններ տարբեր ոլորտներում, այդ թվում՝ էներգետիկա, տրանսպորտ, ներդրումներ, արտաքին քաղաքականություն և ռազմարդյունաբերական համագործակցություն։