Էրդողանը ողջունել է Պաղեստինի պետականությունը ճանաչելու վերաբերյալ Ֆրանսիայի որոշումը

Թուրքիայի նախագահ Ռեջեփ Թայիփ Էրդողանը Ֆրանսիայի նախագահ Էմանուել Մակրոնի հետ հեռախոսազրույցի ընթացքում ողջունել է Ֆրանսիայի որոշումը՝ ճանաչել Պաղեստինը որպես անկախ պետություն։

«Նախագահ Էրդողանը շնորհավորել է Ֆրանսիայի նախագահ Մակրոնին Պաղեստինը պետություն ճանաչելու որոշմումը », –հայտնել է Էրդողանի գրասենյակը:

Ինչպես հաղորդվում է, Էրդողանն ու Մակրոնը քննարկել են Գազայի գոտում և տարածաշրջանում տիրող իրավիճակը։ «Նախագահ Էրդողանը նշել է, որ Գազայում հումանիտար իրավիճակը վատթարացել է, և որ միջազգային հանրությունը պետք է հնարավորինս շուտ քայլեր ձեռնարկի խնդրի շտապ լուծման համար։ Նա ընդգծել է, որ Իսրայելի և Պաղեստինի միջև հակամարտությունը պետք է դադարեցվի, և տարածաշրջանում կայուն խաղաղություն հնարավոր է միայն երկու պետությունների ստեղծման սկզբունքի հիման վրա», – ասվում է հաղորդագրության մեջ։

Հիշեցնենք, որ հուլիսի 24-ի երեկոյան Մակրոնը հայտարարել է, որ Ֆրանսիան սեպտեմբերին՝ ՄԱԿ-ի Գլխավոր ասամբլեայի նիստի ժամանակ, պաշտոնապես կճանաչի Պաղեստինի պետականությունը։ Նրա կարծիքով՝ «այժմ ամենակարևորը Գազայում պատերազմը անհապաղ դադարեցնելն է և խաղաղ բնակչությանը օգնություն տրամադրելը»։ Նա նաև հանդես է եկել պաղեստինյան արմատական ՀԱՄԱՍ շարժման զինաթափման, անվտանգության ապահովման և Գազայի վերականգնման օգտին։