Պաղեստինի ինքնավարությունը խստորեն դատապարտել է օգոստոսի 3-ին Երուսաղեմի Ալ-Ակսա մզկիթի վրա Իսրայելի ազգային անվտանգության նախարար Իտամար Բեն-Գվիրի, Քնեսեթի անդամների խմբի և հրեա բնակիչների կողմից «գրոհը»։ Այս մասին հաղորդում է պաղեստինյան WAFA լրատվական գործակալությունը:
Պաղեստինյան կողմի պնդմամբ՝ Բեն Գվիրը, նրան ուղեկցող խորհրդարանի անդամները և հրեա գաղութաբնակները ներխուժել են Ալ-Ակսա մզկիթի տարածք և այնտեղ կատարել թալմուդյան ծեսեր։
Պաղեստինի ավանդապահության (Վակֆ) և կրոնական գործերի նախարարությունը հայտարարել է, որ Բեն Գվիրի ու նրան ուղեկցողների կողմից կատարված գործողությունները «բացահայտ սադրանք են ոչ թե միայն Պաղեստինի, ամբողջ աշխարհի մուսուլմանների նկատմամբ»։
Նախարարությունը մարդու իրավունքների միջազգային և կրոնական կազմակերպություններին կոչ է արել «ձեռնարկել միջոցներ՝ դադարեցնելու Իսրայելի, մասնավորապես՝ նրա ծայրահեղ աջ ռասիստական կառավարության կողմից շարունակվող խախտումները, որը Բեն Գվիրին և նրա կողմնակիցներին կանաչ լույս է տվել սրբավայրը պղծելու համար»։
Հետևեք մեզ տելեգրամում
