Իսրայելի Անվտանգության կաբինետը հաստատել է վարչապետ Բենյամին Նեթանյահուի՝ Գազա քաղաքը «գրավելու» առաջարկը։
«Անվտանգության կաբինետը հաստատել է վարչապետի առաջարկը՝ «ՀԱՄԱՍ»-ին հաղթելու համար։
Իսրայելի պաշտպանության բանակը կպատրաստվի Գազա քաղաքի վերահսկողությունը ստանձնելուն՝ միաժամանակ մարդասիրական օգնություն բաշխելով մարտական գոտիներից դուրս գտնվող քաղաքացիական բնակչությանը»,-նշված է Իսրայելի վարչապետի գրասենյակի՝ X-ում տարածած հայտարարության մեջ։
Ynet-ը գրում է, որ հայտարարության մեջ կիրառված չէ օկուպացնել բառը՝ անկլավի քաղաքացիական բնակչության համար իրավական հետևանքների պատճառով։
Բանակի գլխավոր շտաբի պետ Էյալ Զամիրը դեմ է Նեթանյահուի այս ծրագրին՝ հաշվի առնելով պատանդներին սպառնացող հնարավոր ռիսկը, զինված ուժերի պահեստազորի սպառումը և պետության միջազգային օրինականությանը հասցված վնասը։
Անվտանգության կաբինետը նաև ընդունել է պատերազմը դադարեցնելու հինգ սկզբունք՝ «ՀԱՄԱՍ»-ի զինաթափում, գերիների վերադարձ՝ կենդանի, թե մեռած, Գազայի հատվածի ապառազմականացում, Իսրայելի կողմից Գազայի հատվածի անվտանգության վերահսկողություն և քաղաքացիական կառավարության ձևավորում, որը չի վերահսկվի ո՛չ «ՀԱՄԱՍ»-ի, ո՛չ էլ Պաղեստինի ինքնավարության կողմից։
Հետևեք մեզ տելեգրամում
