Սիրիան և Իսրայելը սեպտեմբերի 25-ին ԱՄՆ նախագահ Դոնալդ Թրամփի ներկայությամբ կստորագրեն անվտանգության մասին համաձայնագիր: Այս մասին հայտնում է The Independent թերթի արաբական տարբերակը՝ վկայակոչելով Դամասկոսի բարձրաստիճան աղբյուրներին։
Պարբերականի տվյալներով՝ համաձայնագրի ստորագրմանը կնախորդի Սիրիայի նախագահ Ահմեդ ալ-Շարաայի ելույթը ՄԱԿ-ի Գլխավոր ասամբլեայում։
Միևնույն ժամանակ, աղբյուրները նշել են, որ Սիրիան և Իսրայելը մոտ ապագայում մտադիր չեն ստորագրել համապարփակ խաղաղության պայմանագիր և կսահմանափակվեն միայն անվտանգության հարցերով։
Օգոստոսի սկզբին Իսրայելի ռազմավարական պլանավորման նախարար Ռոն Դերմերը Փարիզում երկու անգամ հանդիպել է Սիրիայի արտաքին գործերի նախարար Ասադ ալ-Շայբանիի հետ։ Բանակցություններին մասնակցել է ԱՄՆ հատուկ դեսպան Թոմ Բարաքը։
Բանակցությունները կենտրոնացած են լարվածության թուլացման, Սիրիայի ներքին գործերին չմիջամտելու և 1974 թվականի համաձայնագրի վերականգնման վրա, ըստ որի՝ Սիրիայի օկուպացված Գոլանի բարձունքներում սահմանվել էր բուֆերային գոտի՝ ՄԱԿ-ի վերահսկողության ներքո։
Հետևեք մեզ տելեգրամում
