Առաջիկայում ամերիկյան կողմի հետ համաձայնություն ձեռք կբերվի և կհրապարակվի «Թրամփի ուղուն» վերաբերող հուշագիրը: Այս մասին հայտարարեց վարչապետ Նիկոլ Փաշինյանը կառավարությունում ճեպազրույցի ժամանակ՝ պատասխանելով հարցին, թե ինչու մինչ այժմ չեն հրապարակվել ԱՄՆ-ի հետ Վաշինգտոնում ստորագրված երկկողմ հուշագրերը, որոնցից մեկը վերաբերվում է Հայաստանի տարածքով անցնող «Թրամփի ուղուն»:
«Աշխատանքային պայմանավորվածություն ունենք, որ հրապարակենք Վաշինգտոնում կնքված հուշագրերի բովանդակությունը, բայց ոչ տեքստը: Բայց, քանի որ հետաքրքրությունը մեծանում է մեր հանրության շրջանում, կարծում եմ, որ մենք առաջիկայում ամերիկյան գործընկերների հետ համաձայնություն ձեռք կբերենք և կհրապարակենք նաև այդ փաստաթղթերը»,- ասաց վարչապետը:
Վարչապետը հայտնեց, որ հետաքրքրված յուրաքանչյուր փորձագետ և Ազգային ժողովի ցանկացած պատգամավոր կարող է ծանոթանալ այդ տեքստի բովանդակությանը, որի մեջ, ըստ Փաշինյանի, որևէ գաղտնի չկա:
«Այդ փաստաթղթերն իրենք իրենց էությամբ և բովանդակությամբ գաղտնի չեն, իրենց վրա գաղտնի գրություն չկա գրված և դա աշխատանքային փաստաթուղթ է: Ես կարծում եմ, որ առաջիկայում մենք կհրապարակենք»,- ասաց Փաշինյանը:
Հետևեք մեզ տելեգրամում
