Վրաստանը Եվրահանձնաժողովին է ներկայացրել վիզաների ազատականացման հետ կապված առաջարկությունների զեկույցը

Վրաստանի ԱԳՆ տվյալներով՝ օգոստոսի 31-ին Եվրահանձնաժողովին է ներկայացվել Վրաստանի կողմից վիզայի ազատականացման հետ կապված առաջարկությունների կատարման վերաբերյալ զեկույցը։ Այս մասին տեղեկանում է InterPressNews․ge-ն՝ հղում անելով ԱԳՆ-ին։

«Սահմանված ժամկետում, զեկույցը ներկայացվել է Եվրոպական հանձնաժողովին»,- հայտնել են արտգործնախարարությունից։

Նշենք, որ սույն թվականի հուլիսին ԵՄ հանձնաժողովը նամակներ էր ուղարկել Վրաստանի կառավարությանը՝ նախազգուշացնելով, որ Վրաստանի քաղաքացիների համար առանց վիզայի ճանապարհորդությունը կարող է դադարեցվել, եթե երկիրը չկարողանա կատարել հիմնական առաջարկությունները:

ԵՄ-ն հետևյալ 8 առաջարկություն էր արել Վրաստանի իշխանությանը՝

1․ Ապահովել և պահպանել Վրաստանի բոլոր քաղաքացիների հիմնարար իրավունքների պաշտպանությունը, ներառյալ միավորումների, հավաքների և խոսքի ազատությունները, անձնական կյանքի իրավունքը, հասարակական գործերին մասնակցելու իրավունքը, ինչպես նաև խտրականության արգելքը։

2․ Խուսափել և չեղյալ համարել ցանկացած օրենսդրություն, որը կարող է սահմանափակել հիմնարար իրավունքներն ու ազատությունները, հակասել խտրականության արգելքի սկզբունքին և հակասել եվրոպական և միջազգային չափանիշներին: Մասնավորապես, չեղյալ համարել «Օտարերկրյա ազդեցության թափանցիկության մասին» օրենքը և «ընտանեկան արժեքների և անչափահասների պաշտպանության» մասին օրենսդրական փաթեթը, ինչպես նաև փոփոխել մարդու իրավունքների վերաբերյալ ազգային ռազմավարությունը և գործողությունների ծրագիրը՝ ԼԳԲՏ անձանց իրավունքների լիարժեք պաշտպանությունն ապահովելու համար։

3․Համապատասխանեցնել Վրաստանի վիզային քաղաքականությունը ԵՄ վիզայի պահանջ ունեցող երրորդ երկրների ցանկին, մասնավորապես՝ ԵՄ-ի համար անկանոն միգրացիա կամ անվտանգության ռիսկեր ներկայացնող երկրների վերաբերյալ։

4․Ակտիվացնել անհիմն ապաստանի դիմումների և ԵՄ անդամ պետություններում անկանոն մնալու խնդիրը լուծելու գործողությունները, ինչպիսիք են՝ համապատասխան միգրանտների պրոֆիլներին ուղղված անվիզա ռեժիմի վերաբերյալ տեղեկատվական արշավները և սահմանային ստուգումների խստացումը։

5․ Ստեղծել Ակտիվների վերականգնման գրասենյակ և Ակտիվների կառավարման գրասենյակ և շարունակել ջանքերը ակտիվների հայտնաբերման, սառեցման, կառավարման, բռնագրավման և օտարման ուղղությամբ։

6․Ընդունել նոր հակակոռուպցիոն ռազմավարություն և գործողությունների ծրագիր՝ ապահովելով դրանց իրականացման համար բավարար ռեսուրսներ և հատուկ ուշադրություն դարձնել բարձր մակարդակի կոռուպցիայի գործերի քննությանը, հետապնդմանը և դատաքննությանը։

7․Փոփոխություններ կատարել «Կոռուպցիայի դեմ պայքարի բյուրոյի մասին» օրենքում՝ հաշվի առնելով Վենետիկի հանձնաժողովի հիմնական առաջարկությունները։

8․Համապատասխանեցնել «Անձնական տվյալների պաշտպանության մասին» օրենքը ԵՄ օրենսդրությանը։