Ֆրանսիական դատարանը միջազգային կալանքի օրդեր է տվել Սիրիայի նախկին նախագահ Բաշար ալ-Ասադի և նրա վեց մտերիմների համար։
Ձերբակալման օրդերները տրվել են ամերիկացի լրագրող Մարի Քոլվինի և ֆրանսիացի լուսանկարիչ Ռեմի Օքլիի մահվան կապակցությամբ, որոնք զոհվել էին 2012 թվականին սիրիական Հոմս քաղաքի կառավարական ռմբակոծության ժամանակ։ Ֆրանսիայի կառավարությունը այս հարվածները որակում է որպես մարդկության դեմ հանցագործություն և ռազմական հանցագործություն։
Բաշար ալ-Ասադից բացի, ձերբակալման օրդերներ են տրվել նրա եղբորը՝ Մահեր ալ-Ասադին, հետախուզության պետ Ալի Մամլուքին և բանակի շտաբի նախկին պետ Ալի Այուբին։
Բաշար ալ-Ասադը Սիրիայի նախագահ է եղել 2000-ից 2024 թվականներին։ 2011 թվականին նա բռնի կերպով ճնշել է կառավարության դեմ բողոքի ցույցերը, ինչը հանգեցրել է երկրում քաղաքացիական պատերազմի։ 2024 թվականի դեկտեմբերին Ասադի իշխանությունը տապալվեց, և նա Դամասկոսից Մոսկվա փախավ։
Հետևեք մեզ տելեգրամում
