Ստրասբուրգում ընթանում է Եվրոպական խորհրդարանի (ԵԽ) լիագումար նիստը, որի օրակարգում է նաև Գազայում տիրող հումանիտար ճգնաժամը։ Եվրամիության (ԵՄ) արտաքին հարաբերությունների և անվտանգության հարցերով բարձր հանձնակատար Կայա Կալասն ընդգծել է, որ Եվրոպական հանձնաժողովը պատրաստ է դադարեցնել առևտրային կապերը և համագործակցությունը Իսրայելի հետ, սակայն անդամ երկրները խոչընդոտում են հետագա քայլերին։
«Արմենպրես»-ի փոխանցմամբ՝ Գազայում շարունակվող պատերազմի համար Իսրայելի նկատմամբ պատժամիջոցներ սահմանելու հարցում ԵՄ-ում առկա խորը տարաձայնություններն արտացոլվել են նաև լիագումար նիստի ժամանակ։ ԵԽ հիմնական և մեծ քաղաքական խմբակցությունների ղեկավարների ու պատգամավորների մեծ մասը ներկա չի գտնվել քննարկմանը։ ԵՄ գլխավոր դիվանագետի խոսքով՝ հնարավոր չէ որպես Միություն առաջ շարժվել, քանի դեռ անդամ պետությունները նույն տեսակետը չեն կիսում։
«Մեր գործողությունների տարբերակները հստակ են և մնում են սեղանին, սակայն անդամ պետությունները համաձայն չեն այն հարցում, թե ինչպես ստիպել Իսրայելի կառավարությանը փոխել ընտրած ճանապարհը», – նշել է Կալասը։ Նրա խոսքով՝ ԵՄ-ն պատրաստել է հնարավոր քայլերի «ցանկ», ներառյալ առևտրային կապերի դադարեցումը և Իսրայելի մասնակցության դադարեցումը «Horizon» հետազոտական ու նորարարական հիմնադրամին, սակայն «միասնություն չկա այն հարցում, թե ինչ քայլ պետք է լինի հաջորդը»։
Իսպանիան և Բելգիան նախընտրում են խիստ քայլեր, մինչդեռ Գերմանիան և Հունգարիան հանդես են գալիս ավելի զուսպ դիրքորոշմամբ։ «Կարծում եմ՝ պետք է շարունակենք դիվանագիտական ջանքերը Իսրայելի հետ, որովհետև ոչ մի տեղ չենք հասնի, եթե չխոսենք»,– եզրափակել է Կալասը։ Նա հիշեցրել է, որ ԵՄ-ն նախկինում ևս քննադատել է Իսրայելի կողմից քաղաքացիական օգնության արգելափակումը՝ մեղադրելով «տասնամյակների հումանիտար սկզբունքները» խաթարելու մեջ, սակայն այդ քննադատությունները գործնական քայլերի չեն վերածվել։
Հետևեք մեզ տելեգրամում
