Արսեն Բալայանը՝ ազատ ոճի ըմբշամարտի աշխարհի չեմպիոն

Կալինինգրադաբնակ հայ Արսեն Բալայանը Ռուսաստանի հավաքականի կազմում նվաճել է ոսկե մեդալ 2025-ի ազատ ոճի ըմբշամարտի մինչև 23 տարեկանների աշխարհի առաջնությունում, որը կայանում է Սերբիայի Նովի Սադ քաղաքում։

86 կգ քաշային կարգում Բալայանը եզրափակչում հաղթանակ է տարել Մոլդովայի ներկայացուցիչ Էուգենիու Միխալչանի նկատմամբ՝ 10:0 հաշվով։ Սա Ռուսաստանի հավաքականի միակ ոսկին է ընթացիկ մրցաշարում։

Եզրափակիչ հասնելու ճանապարհին Արսենը հաղթել է Ադրբեջանի ներկայացուցիչ Ալի Ցոկաևին՝ 7:1, Վրաստանի ներկայացուցիչ Տորնիկե Սամխարաձեին՝ 10:0 և Իտալիայի ներկայացուցիչ Գաբրիելլե Նիկկոլինիին՝ 10:0։

Նշենք, որ այս տարի Արսենը դարձել էր նաև Եվրոպայի չեմպիոն նույն տարիքային խմբում՝ մինչև 79 կգ քաշային կարգում։